首頁  > Blog
《教練,謝謝你!》 - 香港男女子少年排球代表隊 
發佈日期 2022年06月06日
Print Friendly and PDF

關於林子聰 |馬家浠林文杰劉穎霖林賀徨李瑋霖

關於《教練,謝謝你!》

踏上排球路總會遇到高低起伏,途中除了自己的努力、隊友的互相扶持外,教練的一字一句,甚或一個舉動,都能推動大家不斷進步,成就今天的你。

《教練,謝謝你!》系列由各香港青少年排球及沙灘排球代表隊球員親自撰寫,旨在表達對啟蒙教練的謝意,分享球員背後,啟蒙教練對他們的影響。同時亦藉此機會表揚這班為本地球壇默默付出,努力培育下一代的教練獻上崇高敬意!

《教練,謝謝你!》逢星期一於香港排球代表隊 Facebook專頁及Instagram刊登,記得follow我地喇!

返回頂部

 

林子聰

戴嘉傑教練,謝謝你!

“A for attitude not ability “ 這是我中學排球隊印在訓練球衣上的一句句子。也許對別人來說只是一句再普通不過的句子,但對我來說卻意義非凡……

這是教練你想對我說的話。

記得我曾經有一段時間經常練習遲到,即使在練習中也毫不認真 (可能是因為自己那時是代表隊,心態上認為自己高人一等) 。在一次比賽後你突然叫停我,經過一輪談話後,你的眼淚奪眶而出,因為你認為是你教導有問題令我出現負面的轉變,而我亦因此感到非常抱歉、後悔。過了一陣子,平復心情的你開始向我講述訓練球衣的由來,「在我設計這件訓練球衣時,我第一個想起的就是你,當中的英文句子也是我很想對你說的話。」我聽到這句話後百感交集,認為自己真的辜負了你的信任,最後決志要改變!

後來我也決定遵從你的教誨,在對待任何一件事上要有正面態度,就算是微不足道的也一樣。「因為能力並不代表一切」這是你告訴我的。

很慶幸我人生中能夠遇到你。你並不是我接觸排球的第一個教練,卻是一位讓我獲益良多的好教練!不論是在排球路上,你教給我各種技術,令我從一個甚麼都不懂的新手,成為現在可以獨當一面的球員;或是人生道路上,讓我了解正確的人生觀,從而找到屬於自己的人生目標。你說過的每一句話都在我心中留下深刻的印記。請原諒再不厭其煩地說多一次:「戴嘉傑教練,謝謝你!」

- 香港男子少年排球隊球員 林子聰

圖: 香港男子少年排球代表隊球員林子聰(右)及戴嘉傑教練(左)。

返回頂部

 

馬家浠

葉寶林教練,謝謝你!

寶林Sir係我喺香港女子少年排球隊嘅教練,佢俾我嘅第一印象係呢個人好嚴厲好惡,感覺如果做錯動作就一定會俾佢鬧。我記得第一次見到寶林Sir,係入選第一階段嘅第一次練習,對我嚟講真係好尷尬,因為我第一次練習之前咁啱做完手術需要請假,感覺唔係太好但係又冇辦法,加上第一次見到寶林Sir,真係會好驚㗎!

經過持續差唔多半年嘅練習,由第一階段去到第二階段,我發現寶林Sir其實好nice,有時仲好搞笑,令我地嘅練習成日都充滿笑聲。我喺寶林Sir身上學到對待練習嘅熱誠同真心,明白到打波要有heart同有團火,如果得個軀殼嚟練波,個心唔知飄咗去邊,練習完就只有「攰」呢個感受;相反地有heart咁去練習雖然都會攰,但係同時都會帶嚟一種滿足感。我記得寶林Sir成日講熱誠係重要嘅,有熱誠先會盡力去完成每一個練習,呢句係令我覺得最深刻嘅說話,令到我不斷去反思。佢教導嘅熱誠感染到我,令我都想成為好似佢咁有目標同有幹勁嘅人。

寶林Sir,多謝你教識我無論係技術上定係態度上嘅知識,希望以後有更加多嘅機會跟你學嘢!

- 香港女子少年排球隊球員 馬家浠

圖: 香港女子少年排球代表隊球員馬家浠(左)及葉寶林教練(右)。

返回頂部

 

林文杰

梁美殷教練,謝謝你!

佢係我嘅小學教練,仲記得小學二年級第一次接觸排球呢項運動,我仲係一個咩都唔識嘅無名小子,每日只會出去同朋友出街玩,唔會自動自覺坐定定喺度溫書準備考試。但係自從我接觸左排球之後,我成日會為左可以去練排球,逼自己係練波之前做好功課。你教識我咩嘢係堅持,你講過做人需要「永不放棄」嘅精神。仲記得小五嗰年,我發揮失常,無緣全港排球決賽,被你係咁鬧,所以自從嗰陣時起,我偷偷向你保證我一定會係下一年攞返嗰冠軍返來,因為我唔想我地被人地睇死;我要證明俾佢哋知,我地一定可以做到,只要永不放棄的精神,便可以取到成功。沒有昔日嘅你,就沒有今天嘅我。謝謝你!

- 香港男子少年排球代表隊球員 林文杰

圖: 香港男子少年排球代表隊球員林文杰(右)及梁美殷教練(左)。

返回頂部

 

劉穎霖

張秋玲教練,謝謝你!

還記得中一初次見面,當時的我對打排球可說是一竅不通,在你悉心的教導下,我才得以逐漸進步。由發球、下手的姿勢、攻擊的步法到比賽中和隊友的配合,你不厭其煩地一遍遍指導,細心地糾正我。除了球技,你還教會了我團隊的意義和應有的練習態度。在我氣餒的時候,你教我要堅持、不能放棄;在我迷惘的時候,你教我要相信自己;在我感到失望的時候,你會安慰和鼓勵我。你的話語不知不覺地影響著我,使我變得堅強堅毅,更令我徹底愛上排球這項運動。謝謝你總是拋開手上忙碌的事,抽出時間,先解決我的疑難需要。謝謝你和我分享的經驗,教我的道理,令我獲益良多。謝謝你對我的栽培,我會將你的教誨銘記於心,成為一個更優秀的運動員。謝謝你,沒有你就不會有現在的我。

- 香港女子少年排球隊球員 劉穎霖

圖: 香港女子少年排球代表隊球員劉穎霖(右一)及張秋玲教練(左二)。

返回頂部

 

林賀徨

陳皓宜教練,謝謝你!

好幸運有你作為我排球路上嘅啟蒙教練,由我初初開始接觸排球,你落手落腳去教,由下手到上手,再去到每一個殺波動作,讓我明白基本功嘅重要性,為我日後嘅排球路上奠定基礎。我嘅成就未算大,但你絕對係一個對我影響深遠嘅人,我哋相處時間只有短短兩年,呢段期間你不斷推動我前進,我哋一齊成長一齊進步,你教識我一隊人要齊上齊落,記得你講過:「排球係一個團隊運動,少一個人都唔得」,多謝你一路支持我去嘗試任何挑戰,唔好遇到困難就退縮,不斷給予我意見,讓我在排球路上,茁壯成長。

- 香港男子少年排球代表隊球員 林賀徨

圖: 香港男子少年排球代表隊球員林賀徨(左)及陳皓宜教練(右)。

返回頂部

 

李瑋霖

謝兆基教練,謝謝你!

謝sir係我小學四年排球生涯嘅教練。 佢成日同我地講「只要個波一日唔落地,場比賽一日都未完。」呢一句真係令我一直記喺心裡面,都係因為呢句說話令我打排球堅持到宜家。 我同教練最難忘嘅一場比賽,可能就係我地反勝嘅一場比賽,亦係我最後一次嘅小學學界比賽。 前一年我地輸咗畀一直以嚟嘅對手,今年都係對返佢地。 而今次嘅比賽,往日睇落輕鬆嘅教練,都喺佢臉上睇到一絲緊張。 雖然我地先輸一局,但不論場內嘅隊友,定係教練都唔放棄,最後我地追返分數之後反勝。 可能係大家眼中係好普通平凡既比賽,但呢場比賽應該係我堅持落去嘅開始吧。 謝sir,多謝你! 如果冇你一開始嘅教導,就冇宜家一路堅持打排球嘅我!

- 香港女子少年排球隊球員 李瑋霖

圖: 香港女子少年排球代表隊球員李瑋霖(右)及謝兆基教練(左)。

返回頂部

 

 

Print Friendly and PDF
Copyright © 2022 Volleyball Association of Hong Kong, China Limited. 版權所有 不得轉載
Copyright © 2022 Volleyball Association of Hong Kong, China Limited. 版權所有 不得轉載